༸སྐྱབས་རྗེ་པད་ནོར་ཡང་སྲིད་རིན་པོ་ཆེའི་ཞབས་བརྟན།

༸སྐྱབས་རྗེ་རྡོ་གྲུབ་ཆེན་སྐུ་ཕྲེང་བཞི་པས་མཛད།

ཨོཾ་སྭསྟི།

ཕྱོགས་བཅུའི་རྒྱལ་བ་སྲས་བཅས་རབ་འབྱམས་དང་།།

རིགས་བརྒྱའི་ཁྱབ་བདག་ཨོ་རྒྱན་ཐོད་ཕྲེང་རྩལ།།

ཁྱད་པར་འཆི་མེད་ཚེ་ལྷའི་བྱིན་མཐུ་ཡིས།།

མགོན་ཁྱོད་བསྟན་འགྲོའི་དཔལ་དུ་འཚོ་གཞེས་གསོལ།།

གདོད་ནས་མི་འགྱུར་ཡེ་དག་ཆོས་སྐུའི་ཀློང་།།

འཕོ་མེད་བདེ་ཆེན་ཡེ་ཤེས་རྩལ་རྫོགས་ཀྱང་།།

སྙིགས་དུས་འགྲོ་ལ་ཕན་བདེའི་འོད་སྣང་འབྱེད།།

ས་གསུམ་སྐྱེ་དགུའི་འདྲེན་མཆོག་འཚོ་གཞེས་གསོལ།།

བི་མའི་གསང་གསུམ་ཡེ་ཤེས་སྒྱུ་འཕྲུལ་གར།།

གསང་སྔགས་བཀའ་གཏེར་མཛོད་ལ་མངའ་དབང་བསྒྱུར།།

ཕྱི་ནང་བདུད་སྡེའི་དཔུང་ཚོགས་ཟིལ་གནོན་ཏེ།།

སྔ་འགྱུར་བསྟན་པའི་རྒྱན་དུ་འཚོ་གཞེས་གསོལ།།

བསླུ་མེད་མཆོག་གསུམ་ཐུགས་རྗེའི་བྱིན་རླབས་དང་།།

བདག་ཅག་དད་པས་གསོལ་བཏབ་བདེན་པའི་མཐུས།།

རྟག་བརྟན་གཞོམ་མེད་རྡོ་རྗེ་ལྟ་བུའི་སྐུར།།

ཞབས་པད་བརྟན་ཅིང་བཞེད་དོན་ལྷུན་གྲུབ་ཤོག།

ཅེས་གྱང་ཁང་སྤྲུལ་སྐུ་ཐུབ་བཟང་མཆོག་གིས་གཙོས། དཔལ་ཡུལ་བླ་གྲྭ་ཡོངས་ནས་གསུང་བསྐུལ་ངོར། གྲུབ་དབང་པདྨ་ནོར་བུ་རིན་པོ་ཆེའི་ཡང་སྲིད་མི་འགྱུར་བདེ་ཆེན་གར་དབང་ཟིལ་གནོན་རྡོ་རྗེ་ཞེས། མཚན་གྱི་ཅོད་པན་འཆང་བ་གང་ཉིད་སྐུ་ཚེ་ཞབས་པད་བརྟན་པའི་རྟེན་འབྱུང་དུ། ཕྱི་ལོ་ ༢༠༡༦ རབ་ལོ་ ༡༧ མེ་སྤྲེལ་ཟླ་ཚེས་བཟང་པོར། འབྲས་ལྗོངས་མཆོད་རྟེན་དགོན་ནས་རྡོ་གྲུབ་བཞི་པས་སྨོན་ཚིག་ཏུ་བརྗོད་པ་དགེ་ལེགས་སུ་གྱུར་ཅིག